Det er ikkje godt å seie kor mange som
vert med på årets Veikingkonvoi. Sommaren 1998 var det stygt ver
då Veikingkonvoien kasta loss, likevel vart 50 båtar med på
ferda.
Alternative veikingar
Byråkratiske ordningar som påmelding før avreise driv dei ikkje
med i Veikingkonvoien, iifølgje offisiell talsmann Vidar Nupen.
- Vi krev inn påmeldingsavgift fyrst etter at vi er framme i
Rognaldsvågen. Tradisjonen tru fylgjer vi portosatsane. Kajakk går
til dømes som D-post, kan Vidar Nupen fortelje. Vi har eigentleg
ei øvre grense på båtstorleiken på 30 fot, men sidan vi ikkje
klarar heilt å unngå større båtar, får dei vere med mot at
dei betaler straffeporto lik dobbel takst. Vi er litt skeptiske
til å gå Båsundet, så vi satsar på å gå ei alternativ rute
- sørsida mot Skorpa.
Tom for kraft og sats
Eit rykte vil ha det til at Vidar Nupen har gjeve lovnad til to
blondiner om at dei skal få vere med "storegavlen" på
Veikingkonvoien. Sjølv om Nupen har pussa og stelt med "storegavlen"
i fleire månader, viser det seg at båten kanskje ikkje vert
ferdig i tide.
- Nupen svann bort, han jobba seg mest i hel for dei to blondinene
si skyld, seier Dag Knapstad. Vi har vore alvorleg bekymra for
han.
- Ja, eg kan berre stadfeste at eg vart til slutt heilt tom for
både kraft og sats i arbeidet med "storegavlen", seier
Vidar Nupen. Eg var jo redd for at dei to blondinene ikkje ville
verte med viss ikkje "storegavlen" vart klar.
Blodig alvor
- Vi anar ikkje korleis det økonomiske fell ut i år, seier Vidar
Nupen. I 1998 gjekk vi i minus på grunn av det dårlege veret.
- Kva gjorde de med den minusen frå 1998 då?
- Nei, det anar eg ikkje, seier Vidar Nupen, det er ikkje så
mange av oss som er så sterke i kredit og pleti. Men vi vonar at
vi i år som i fjor skal få vere gavmilde mot barn og unge i
kyst-nære strok ved å dele ut av eit eventuelt overskot til
ideelle organisasjonar.
|
