Med jonsokaftan som fell på ein
laurdag, slepp vi òg diskusjonen om bålet skal vere på sjølve
jonsokaftan eller ikkje.
Mange frivillige
Saga Fjordbase med Agnar Strømsnes i spiss tek grep over sjølve bålbygginga.
Dermed kan Florø-folk allereie no starte å gle seg til at det blir god
tradisjonsrik feiring og ikkje like bållaust som i fjor. Med store
lager av pallar og anna kassert trevyrke har basefolket stor tilgang på
godt byggemateriell.
Fleire frivillige i Florø vil stå bak arrangementet.
MC-klubben vil rigge opp til stor bryggedans på det gamle fabrikkområdet
på Rota, og klubben er òg i stand til å sikre deltakarane mot regn og
anna plage som kan dempe på kosen. Dei vil sette opp eit stort telt
over sjølve danseplattingen om veret skulle truge. Her blir det òg
rigga til scene og serveringstelt. Kven som skal stå for musikken er
enno ikkje klart. "Atløy" vil elles gå i skytteltrafikk
mellom Florø og Rota for å frakte folk til arrangementet.
Veiking-dato
Dei som noterte seg datoen for Veikingkonvoien i kulturkalenderen i
Firdaposten nyleg, bør merke seg at konvoien startar fredag 22. juni.
Dermed får Flora-folket tilbod om to store helgefeiringar like etter
einannan i juni. Konvoien går inn i jonsokfeiringa helga etter
Kinnaspelet, Sildebordet og Irsk-norsk festival, og ikkje som det stod i
kulturkalenderen, opplyser veikingsjef Vidar Nupen som står bak
konvoien saman med Dag Bjerk og Dag Knapstad.
Dei held fast på ei relativt anarkistisk og uformell
organisering av konvoien, men litt koordinering må til, seier Nupen. Sjølv
håpar han å kunne mønstre på med gavlen til Adolf Skorpeide som han
over to vintrar har restaurert saman med Magnus Frøyen og Ragnar
Kristiansen. Dei får han nok på sjøen til konvoien, men det er meir
tvilsamt om dei får rigga han med segl før årets store prøvetur.
Gler seg
– Gler du deg?
– Klart eg gjer det, sjølv om det blir litt kav. Det
er starten på båtlivet i år. Det kjekkaste med heile konvoien er å møte
att folk som kjem igjen år etter år, svarer Nupen.
Fredag 22. juni legg veikingane ut til Stavang for å prøve
ut det nye tilbodet til Anders Haave og Leidulf Grytten. Her blir det
bryggedans og litt program. Blir det som andre veikingkonvoiar, kan dei
vente seg 120 båtar til Stavang denne helga, utan at det blir noko
problem med plassen.
Laurdagen legg veikingane ut frå Stavang for å ankre
opp i Rotavågen til jonsokfeiringa på Rota. Her blir det nok endå
tettare med båtar.
