|
Det var ikkje lenge dei vart gåande (eller
seglande?) som vaklande og villfarne, veikingane. Og årets
fredagshamn ligg berre ein pekyrandes liten tur frå
utgangspunktet på Florevika - nemlig på Færøykavlen.
For nokre veker sidan melde Firdaposten at det såg ut til at dei
bolde veikingane ikkje ville få ei felles hamn å gå til i år.
Konvoileiinga gjekk ut og bad folk om å finne seg ei valfri hamn
fredagen, ettersom dei ikkje hadde greidd å få landingsløyve
nokon stad.
Generalsekretær Dag Knapstad vedgjekk at noko av årsaka kunne
vere at dei var litt seint ute med førespurnaden i år, og slo
fast at han hadde full forståing for at fleire grendelag sa nei
takk til besøk.
- Det er ein stor jobb å ta i mot veikingane og ein får kanskje
litt lite att for arbeidet, sjølv om grendelaga får behalde alle
inntektene og kanskje sit att med 40-50.000 kroner. Dei
arrangerer dans og og matservering og har vakthald i hamna. Men
veikingane er kanskje litt for lite flinke til å nytte seg av
tilboda. Mange blir sittande vel lenge i båtane og kose seg,
noko som er synd for dei som lagar arrangement på land, seier
Knapstad.
Men no har altså hellet snudd for det fryktsomme sjøfarande
folket, og Færøykavlen håper dei skal finne plass til alle som
kjem. Det er mogleg ikkje alle får ligge same staden, men vi
håper alle skal få plass.
Som vanleg vil det bli mat og drikke å få kjøpt, og det blir
dans med Punch. |
