|
Årets Veiking-helg er 27-29 juni, og det er
Barekstad på Hovden som er målet laurdag, medan rutinerte Fanøy
tek i mot veikingane for sjuande gong fredagskvelden.
Det gjekk over ti år frå Veikingkonvoien starta opp i 1997 før
Barekstad i 2008 tok mot til seg og opna hamna for ein veik,
vittig og voluminøs gjeng, i følgje dette årets motto.
- Vi vart spurde også i fjor, men då var det vanskeleg å få til.
I år passa det derimot veldig godt. Skulle det bli dårleg vêr,
er det plass til mykje folk på buene her i Barekstad, reklamerer
leiar i grendelaget, Kjell Høyvik.
Han fortel at veikingane var svært nøgde med opplegget sist dei
var på besøk:
- Dei sa dei rekna historia si før og etter Barekstad, humrar
han, og fortel at det vart spesielt sett pris på at dei hadde så
rikeleg med vakter på jobb under arrangementet.
Også vêret viste seg frå si aller beste side dette året, og til
dei som no lurar på om dei skal legge den viltre og vidunderlege
Veiking-helga inn i kalenderen har Høyvik dette å sei:
- Dei som var her sist, var ein fredeleg gjeng. Litt må ein jo
rekne med når så mange samlast - eit par stykker datt til dømes
på sjøen, men dei kom fort opp att. Alle er hjarteleg velkomne! |
