|
Vyrde Veiking!
I år kastar
Veikingkonvoien loss for visstnok 16. gong. Nok ein gong har
presset frå Florøfolk, Værlendinga, Ålfotingar og andre føter
gjort at vi rustar oss til landets største båtkonvoi!
Fredag dreg vi til Sunnfjords perle; Svanøya. Grendalaget
stiller med ein vakker våg, rikeleg med flytebrygger, store telt
og god stemning på kaiene. Her vert det god gammaldags kaidans
og fest langt ut i dei små timar. Sjølvsagt blir det servert
kulinariske gleder for strupe og mage til langt på natt! Hugs
Brylcreme og Stomatol!
Laurdag vaknar vi som vanleg til strålande solskin! Etter
sortering av dieselfilter, mjølkeglas, solkrem og kaviar, tek vi
det store steget og kryssar kommunegrensa for første gong!! Vi
dunkar oss nemleg heilt inn til kunst- og kulturbygda Vevring
der bygdefolket inviterer til Slåtte-rock. Her skal vi nyte det
late liv; preike med gamle kjende, spele gitar og jamme som det
heiter. Elles skulle her vere aktivitetar for store og små. Ut
på kvelden vert det mange kulturelle aktivitetar, konsertar,
dans og jonsokbrising.
Det er sjølvsagt ikkje tilfeldig at vi dreg nettopp til Vevring
i år. Vi veikingar er engsteleg for kva som vil skje når eit
heilt fjell skal malast til steinmjøl og dumpast i fjorden. Vi
kjem såleis til å markere vår uro ved å reise eit monument over
denne dristige tanken. Bygginga av monumentet gjer vi på dugnad
under kyndig og kunstnarleg leiing.
Vi ber alle Veikingar ta med seg ein høveleg stein!
Som vanleg er det grendelaga og lokale eldsjeler som gjer alt
arbeidet. Vi i konvoileiinga er nøgd med rosande omtale -og eit
kyss på kinnet eller ein annan stad. Elles er det sjølvsagt
viktig for oss at konvoien går fint føre seg, utan slåsting,
båtfyll og anna farkeskap. Reknar med at alle veikingar gjer
sitt til at desse strandhogga vert til gode opplevingar for
alle. Avgifta, kr. 9,- pr. båt (=brevporto) betalar du på kaia.
Båtar over 30 fot betalar dobbel avgift, men trøysta får vere at
kajakkar går som B-post!
Hugs å kjøpe T-skjorte !!! Støtt dei veike!! Veeel møøøtt!!
|
